السلام عليكم
أول شيء أبارك لك جهازك الاندرويدي الجديد
وخليني أنا وياك نشوف وش الأشياء اللي تحتاج تسويها عشان تستعمل جهازك بكل خصائصه الموجودة
أول شيء لازم يكون عندك أو تسوي لك حساب بالجي ميل
وهذا فائدته انه يكون إيميل لك وأنك تقدر تدخل الماركت وتنزل برامج وأيضاً عشان لو نسيت رمز قفل الشاشة تقدر تستعيده عن طريق الأيميل، بالإضافة إلى أنك تقدر تخلي الجهاز ينسخ (ويزامن) جميع الاسماء والأحداث اللي بالتقويم إلى الجي ميل هذا وتبقى كنسخه أحتياطيه حتى لو تفرمت الجوال
الشيء الثاني
إذا كان جهازك مافيه ماركت (زي الجالكسي) تحتاج تسوي الطريقه الموجوده بالنت (دور عليها تلقاها) عشان يطلع لك الماركت وأنا أنصحك تسويها أول شيء قبل لا تضيف برامج واسماء إلى الجهاز لأن هالطريقة راح تفرمت الجهاز
ثالثاً
سوو روت .. يعني زي الجلبريك .. يفتح لك خصائص بالجهاز أكثر .. مثلاً يعطيك صلاحيات تغيير الخط العربي .. وإمكانية الدخول للماركت الأمريكي.. والاق فكس (تسريع الجهاز) طبعاً ماقول سوها كلها مره وحده بس إذا عرفت تسويه سوه مانت خسران شيء
أخلي مسؤوليتي من هالفقرة وأكد أني قلت إذا عرفت تسويه
رابعاً
أدخل على إعدادات الرسائل وأرفع الحد لعدد الرسائل عشان ماتتعطل
أذكر هالحركه كنا نسويها بالنوكيا ونحط الحد 999
خامساً
برامج أنصح فيها
من أشهر مزايا الأندرويد .. الوجدت (الأدوات) اللي تقدر تضيفها على الشاشة الرئيسية .. بس علق بأصبعك على مكان فاضي بالشاشة الرئيسية وتطلع لك خيارات الوجدت.. وإذا تبي خيارات زيادة حمل من الماركت زي البرنامج هذا
فيه الكثير من خيارات الوجدت: التقويم، مواقعك المفضلة، إتصال سريع، مستجدات الفيسبوك وتويتر، والأجندة
للرسائل النصية اس ام اس
مميزات البرنامج أن له ثيمات ملونه وجميلة. وتظهر الرسائل في مربعات تحذير (زي مهو واضح بالصورة اللي فوق يمين) مع إمكانية الرد السريع. ويدعم الأموجي Emoji بنفس التشفير مع الأيفون.. وأمكانية عمل مجلدات للرسائل وقفل بعضها برقم سري وعمل نسخة إحتياطية.
بالنسبة للفيسبوك.. البرنامج الأصلي فيه مشاكل زي بطء وتعليق.. وفيه بدائل كثيرة بالماركت مثل
البرنامج بالأصل للتويتر والفيسبوك سوا.. وبإمكانك وضع أختصارات للقروبات أسهل للوصول.. مع وجود وجدت (أداة الشاشة الرئيسية).. والبرنامج سهل وخفيف وسريع والمطورين ممتازين جداً .. حتى تحديثاته قليلة تجيك بفترات متباعدة
وعلى فكرة برضو حتى برنامج تويتر الأصلي فيه مشاكل وبطء .. وزي ماقلت ممكن تستخدمون البرنامج اللي فوق للفيسبوك وتويتر.. أو فيه برنامج ثاني
من برامجي المفضلة لتويتر .. مافيه زود بس كذا حبيته .. تقدر تحط أكثر من حساب تويتر وتقدر تسوي بوست لتويتر وفيسبوك مره وحده
بالنسبة للي يحب يكتب قوائم كثيره فالخيارات له أكثر
فيه برنامج مهام يتزامن مع قوقل اسمه
البرنامج بسيط وسهل وله وجدت.. برنامج للمهام وقائمة بالأشياء اللي تبي تسويها.. ميزته أنه يوفر خيار التزامن مع قوقل تاسك
أما اللي يبي يكتب أشياء ثقيله ومفكرات هنا وهناك ففيه أفضل وأروع خيار
هذا البرنامج أشتهر بقوة لأنه متوفر على الأندرويد والأيباد والأيفون والبي سي والماك وعلى النت وكل شيء .. أهم ميزة فيه أنك تكتب مفكرات بواحد من أجهزتك على هالبرنامج وتحفظها .. وخلاص تفتحها على الجهاز الثاني تلقها وتقدر تعدل وتحرر وتحط صور ومقاطع صوت.. وتقدر تشارك مفكراتك بتويتر على روابط مباشرة.. برنامج الأندرويد ممتاز ومتطور كثير زائد انه له وجدت
لمتابعة إستهلاكك من البيانات (باقات الأنترنت) فيه برنامج مايزعجك أبد اسمه
زينت هالبرنامج انه يطلع لك رمز صغير فوق لونه أخضر (يعني انت بالسليم وماوصلت الحد اللي انت مشترك فيه بباقة النت) وإذا صار برتقالي معناته انتبه تراك قربت.. وفيه وجدت .. اللي قاهرني بهالبرنامج حاجتين .. ان رمزة كلب وانه احيانا يكون فيه فرق بسيط يعني تقريباً واحد والا ثنين ميقا في الأستهلاك اللي هو موضحه
بالنسبه لعشاق الشات مايحتاج عاد
عاااد هذا ماني شارحة معروف.. واللي مايعرفه اقوله تراه برنامج محادثة يقلب اندرويدك بلاك بيري
ملاحظة: كل البرامج اللي مذكورة هنا أنا مركبها وأستخدمها شخصياً .. وجميعها مجانية.
اللي عنده أي إستفسار يستفسر
No comments:
Post a Comment