بتصير مدير ... كثر سوليتير

أونس وأخف وأكثر لعبة ممكن يلعبها الكبار قبل الصغار هي لعبة الورق المشهوره سوليتير بجميع أنواعها، سوليتير كلاسك، سبايدر، فريسيل ... إلخ

واللي أتوقع أنها مالها دخل أبد بالرياضيات أو الفيزيا ء

يعني مايحتاج تعرف مواد علمية عشان تعرف تلعب هاللعبة وتفوز فيها

لأنها ببساطة تعتمد على صف هالورق، بالنوع (سبيت، ديمن، شريا،هاص) كل نوع تصفه مع اللي مثله بالترتيب من الواحد (الأكه) إلى الشايب

والدليل انها ماتحتاج مواد علمية مثل الرياضيات المعقدة، أنك لو أستبدلت السبيت على سبيل المثال بصور حصن والشريا بصور قرود برضوه راح يكون الفوز باللعبة بأنك تصف الحصن مع بعض والقرود مع بعض بالصغر

 

وش تعتمد عليه أجل؟

أنا أقول انها تعتمد على الحظ وطريقة توزيع الورق، وبنفس الوقت أتوقع أنه كل سوليتير وله حل .. يعني مافيه شيء اسمه السوليتير قفلت بوجهي.. لا أتوقع انه له حل بس محتاج انك ترتب الورق من جديد بطريقة مختلفة وتجرب

وأتوقع بعد انه تعتمد أعتماد كبير على إمكانياتك الإدارية!! وهذا هو الموضوع

وش دخل الإدارة؟

إلا لها دخل ونص، وعشان تفوز بالسوليتير لازم تعرف تدير الورق صح وتحركه للأمام أو الخلف بطريقة تسمح لك أنك ترتب كل الورق صح

أول شيء لازم يكون عندك بعد نظر للأمور، بحيث أنك لو تحرك ورقة لازم تعرف وش اللي ممكن يصير بعدها. وهل هالورقه اللي حركتها راح تفتح لك مجال ولا راح تسكر عليك جميع الطرق؟

ثاني شيء لازم تعرف تستغل الموارد اللي موجودة عندك، مثل الفريسيل سوليتير .. لك فيها أربع خانات تقدر تستخدمها كمحطات انتظار للورق اللي يسكر عليك اللعبة.. بحيث أنك تبعده في خانة فاضيه بس لازم برضوه تعرف متى راح ترجعه لمكان مناسب عشان تكمل اللعبة

ثالث شيء لازم ترتب الأمور بأولويتها.. بحيث أنك تحاول تطلع الورق اللي غاطس تحت أول عشان يمديك تستمر باللعبة .. وتخلي السهل والسريع أخر شيء لانه سهل

رابع شيء لازم تكون حلال مشاكل محترف.. وإذا تقفلت اللعبة، يصير عندك طريقة حلوه وخفيفة كذا بحيث تقدم هذي وترجع هذي وترجع تنفتح معك اللعبة

خامس شيء لازم يكون عندك صبر ومثابرة وطموح (زودتها صح) .. لاتقول هاللعبة هذي مافيه أمل تفوز.. عدها وغير طريقتك باللعب وصدقني راح تفوز .. وزي ماقلت فوق ما أتوقع فيه لعبة سوليتير تخسر